77 சதவீத முதுநிலை பொறியியல் படிப்பு இடங்கள் காலியாக உள்ளன அண்ணா பல்கலைக்கழகம்
தமிழகம் முழுவதும் பொறியியல் கல்லூரிகளில் 77 சதவீத முதுநிலை பொறியியல் படிப்பு இடங்கள் காலியாக இருப்பதாக, அண்ணா பல்கலைக்கழகம் தெரிவித்துள்ளது.
தமிழகம் முழுவதும் உள்ள 332 பொறியியல் கல்லூரிகளில் 16 ஆயிரத்து 728 எம்.இ., எம்.டெக்., உள்ளிட்ட படிப்புகளுக்கான இடங்கள் உள்ளன. இவற்றில் சேருவதற்காக நடத்தப்பட்ட கேட் மற்றும் டான்செட் நுழைவுத்தேர்வில் தேர்ச்சி பெற்ற மாணவர்களுக்கு கடந்த ஆகஸ்ட் 28ஆம் தேதி முதல் 31ஆம் தேதி வரை கலந்தாய்வு நடைபெற்றது.
கலந்தாய்வுக்கு 6 ஆயிரத்து 736 பேர் விண்ணப்பித்திருந்த நிலையில், அவர்கள் அனைவரும் அழைக்கப்பட்டிருந்தனர். ஆனால், 3 ஆயிரத்து 891 பேர் மட்டுமே கலந்தாய்வில் பங்கேற்று பாடப்பிரிவுகளையும், கல்லூரிகளையும் தேர்வு செய்தனர்.
இதனால், தற்போது பொறியியல் கல்லூரிகளில் 23 சதவீத முதுநிலை படிப்பு இடங்கள் மட்டுமே நிரம்பியுள்ளதாகவும், 12 ஆயிரத்து 837 இடங்கள் காலியாக இருப்பதாகவும் அண்ணா பல்கலைக்கழகம் தெரிவித்துள்ளது.
கடந்த ஆண்டை விட மாணவர் சேர்க்கை எண்ணிக்கை பெருமளவு குறைந்திருப்பது பொறியியல் பட்டதாரிகளின் வேலையின்மையை எதிரொலிப்பதாக பார்க்கப்படுகின்றது.